Xocalı soyqrımına həsr edilmiş rəsm müsabiqəsi keçirilib
Tərtər Rayon İcra Hakimiyyətinin, YAP rayon təşkilatının və rayon Təhsil sektorunun birgə təşkilatçılığı ilə Uşaq Gənclər İnkişaf Mərkəzində Xocalı faciəsinin 33-cü ildönümünə həsr olunmuş ümumtəhsil məktəblərinin şagirdləri arasında rəsm müsabiqəsi keçirilib.
Rayonun 44 ümumtəhsil məktəbinin şagirdlərinin iştirak etdiyi müsabiqədə əvvəlcə faciə qurbanlarının xatirəsi bir dəqiqəlik sükutla yad edilib. Tədbirdə rayon icra hakimiyyəti başçısı aparatında İctimai-siyasi və humanitar məsələlər şöbəsi müdirinin müavini Zabil Paşayev, YAP rayon təşkilatının sədri Eldar Əsədov, rayon Təhsil sektorunun əməkdaşı Lamiyyə Məmmədova, mərkəzin direktoru Ülviyyə Qəmbərova çıxış edərək, ermənilərin əsrlər boyu xalqımıza qarşı törətdiyi etnik təmizləmə və işğal siyasətindən bəhs edib, Xocalı faciəsi, ermənilərin dinc əhaliyə qarşı törətdikləri vəhşiliklər barədə danışıblar.
Sonra şagirdlərin Xocalı faciəsinə həsr etdikləri rəsmlərə baxış keçirilib. 8 nəfər-müsabiqənin qalibi müəyyən edilərək YAP rayon təşkilatı tərəfindən diplomlarla təltif olunub.
