Xocalı soyqırımının 33-cü ildönümü ilə bağlı Qarabağ Regional Mədəniyyət İdarəsinin Tərtər nümayəndəliyində ədəbi-bədii tədbir keçirilib
Tərtər Rayon İcra Hakimiyyətinin və Qarabağ Regional Mədəniyyət İdarəsinin Tərtər nümayəndəliyinin birgə təşkilatçılığı ilə rayon mədəniyyət evinin zalında keçirilən təbirdə rayon icra hakimiyyətinin əməkdaşları və mədəniyyət işçiləri iştirak ediblər.
Tədbirdə əvvəlcə Dövlət Himni səsləndirilib. Sonra Ulu Öndər Heydər Heydər Əliyevin və Xocalı soyqrımı qurbanlarının xatirəsi bir dəqiqəlik sükutla anılıb.
Tədbirdə Xocalıya həsr edilmiş kitab sərgisi nümayiş etdirilib.
Nümayəndəliyin yaradıcı kollektivinin hazırladığı “Xocalıda məhv olmuş ümidlər” adlı film izləndikdən sonra Tərtər Rayon İcra Hakimiyyətinin əməkdaşı Svetlana Əzizova Xocalı soyqrımı, erməni vandallarının törətdikləri qətlamlar haqqında danışıb. Xocalı faciəsinin 20-ci əsrin ən qanlı tarixi hadisəsi olduğunu bildirib.
Qeyd olunub ki, Ermənistanın uzun illər azərbaycanlılara qarşı həyata keçirdiyi etnik təmizləmə, nifrət və soyqırımı siyasəti nəticəsində törədilmiş, bəşər tarixinə ən qanlı səhifələrdən biri kimi həkk olunmuş Xocalı soyqırımından 33 il ötür.
1992-ci il fevralın 25-dən 26-na keçən gecə Ermənistan silahlı qüvvələri keçmiş sovet ordusunun 366-cı motoatıcı alayının dəstəyi ilə Xocalı şəhərini işğal etməklə, dinc əhaliyə qarşı soyqırımı cinayəti törətmişdir.
Təkcə Azərbaycan xalqına deyil, bütün bəşəriyyətə qarşı törədilmiş bu soyqırımı cinayəti nəticəsində 613 Xocalı sakini, o cümlədən 63 uşaq, 106 qadın və 70 ahıl şəxs amansızlıqla qətlə yetirilmiş, şəhərin 5379 nəfər sakini zorakılıqla qovulmuşdur. Eyni zamanda, həmin vaxt girov götürülmüş 1275 sakindən 150 nəfərin, o cümlədən 68 qadının və 26 uşağın taleyi hələ də naməlum olaraq qalmaqdadır.
Xocalı soyqırımı törədilən zaman “Müharibə qurbanlarının müdafiəsi haqqında” Cenevrə konvensiyalarının hüquqları kobud şəkildə pozulmuşdur.
2008-ci ilin mayında Heydər Əliyev Fondunun vitse-prezidenti, İslam Konfransı Təşkilatının Gənclər Forumunun baş əlaqələndiricisi Leyla Əliyevanın təşəbbüsü ilə başlayan “Xocalıya ədalət!” beynəlxalq təbliğat-təşviqat kampaniyası artıq uzun illərdir ki, davam edir. “Xocalıya ədalət!” kampaniyasının məqsədi bu qətliam haqqında həqiqətlərin dünyada yayılmasına, bu faciənin Azərbaycan xalqına qarşı soyqırımı kimi tanınmasına nail olmaqdır. İndiyədək Avropa, Asiya, Afrika, Şimali və Cənubi Amerikanın 70-dən çox ölkəsində Xocalı soyqırımı ilə əlaqədar tədbirlər keçirilib. Müxtəlif ölkələrin parlamentləri və dövlət qurumları qarşısında etiraz aksiyaları, piketlər, habelə seminarlar, konfranslar təşkil edilib, kitablar nəşr olunub, filmlər çəkilib. “Xocalıya ədalət!” kampaniyası sayəsində Xocalı faciəsi bir sıra dövlətlər və beynəlxalq təşkilatlar tərəfindən soyqırımı kimi tanınıb.
Sonra söz Qarabağ Regional Mədəniyyət və Turizm İdarəsinin Tərtər rayonu üzrə nümayəndəsi Ceyhun İsmayılzadəyə verilib. O, bildirib ki, Xocalı soyqırımına ilk siyasi-hüquqi qiymət Ümummilli Lider Heydər Əliyevin təşəbbüsü ilə Azərbaycan Respublikasının Milli Məclisi tərəfindən verilmiş və 26 fevral tarixi Xocalı Soyqırımı Günü kimi elan olunmuşdur.
Xocalı soyqırımı ilə bağlı beynəlxalq səviyyədə məlumatlılığın artırılmasına, bu faciənin dünya ictimaiyyəti tərəfindən tanınması və qətliama siyasi-hüquqi qiymətin verilməsinə yönəlmiş “Xocalıya ədalət!” kampaniyası Heydər Əliyev Fondunun təşkilatçılığı ilə dünyanın bir çox ölkəsində davamlı olaraq həyata keçirilir.
İkinci Qarabağ müharibəsindən və 2023-cü ildə həyata keçirilmiş lokal xarakterli antiterror əməliyyatından sonra işğaldan azad edilmiş ərazilərdə aparılan tikinti-quruculuq, axtarış-qazıntı işləri zamanı həmin ərazilərdə, o cümlədən Xocalı rayonunun Əsgəran qalası yaxınlığında aşkar olunmuş kütləvi məzarlıqlar torpaqlarımızın işğalı, habelə Xocalı soyqırımı zamanı azərbaycanlıların Ermənistan hərbçiləri tərəfindən amansızlıqla qətlə yetirildiyini bir daha əsaslı şəkildə sübut edir.
Ceyhun İsmayılzadə bildirib ki, Prezident İlham Əliyevin səriştəsi, uzaqgörən siyasəti sayəsində artıq torpaqlarımız işğaldan azad edilib, işğalçılar layiqli cəzalarını alıblar. Xocalılar doğma yurdlarına qayıdıblar. “Qisas qiyamətə qalmadı”. Ermənilərin 30 il ərzində işğal etdikləri əraziləri Azərbaycan Ordusu 44 günə aldı.
Tədbirdə Qarabağ Regional Mədəniyyət İdarəsi Tərtər Rayon Mərkəzi Kitabxana Sisteminin Oxuculara Xidmət şöbəsinin müdiri Şəlalə Əliyeva da çıxış edib.
Sonda mədəniyyət klublarının fliallarının “dram” dərnəyinin üzvləri “Qarabağ Azərbaycandır” şerini söyləyiblər.
