Tərtərli gənclər Xocalı soyqrımı qurbanlarını yad ediblər
Tərtər Rayon İcra Hakimiyyətinin, YAP rayon təşkilatının və Qarabağ Regional Gənclər və İdman İdarəsinin təşkilatçılığı ilə rayon Gənclər Mərkəzində Xocalı soyqırımının 33-cü ildönümü ilə bağlı tədbir keçirilib.
Tədbirdə rayon icra hakimiyyətinin, YAP rayon təşkilatının, Qarabağ Regional Gənclər və İdman İdarəsinin nümayəndələri, rayonun ictimai-siyasi həyatında fəal iştirak edən gənclər və Xocalı sakinləri iştirak ediblər.
Əvvəlcə soyqırım qurbanlarının xatirəsi bir dəqiqəlik sükutla yad olunub.
Sonra rayon icra hakimiyyəti başçısı aparatında İctimai-siyasi və humanitar məsələlər şöbəsinin müdirinin müavini-dini qurumlarla işin təşkilatçısı Zabil Paşayev tədbiri açaraq, çıxış edib. Qeyd olunub ki,1992-ci il fevral ayının 25-dən 26-na keçən gecə erməni işğalçı qüvvələrinin blokada şəraitində olan köməksiz bir şəhərə-Xocalıya ağır texnika, tank və iriçaplı silahlarla hücuma keçərək, günahsız sakinləri qətlə yetiriblər. Zabil Paşayev faciə zamanı həlak olanlarla bağlı konkret faktları göstərib, Xocalı soyqırımının yalnız Azərbaycan xalqına deyil, bütün bəşəriyyətə qarşı törədilmiş ağır cinayət olduğunu xatırladıb.
Xocalı soyqırımı zamanı 106 qadın, 63 uşaq və 70 yaşlı insan olmaqla 613 nəfər qətlə yetirildi, 1275 sakin girov götürüldü, 150 nəfərin taleyi isə bu günədək naməlum qalıb. Şəhər yerlə-yeksan edilib. Həmin faciəvi gecə zamanı 487 nəfər Xocalı sakini ciddi şəkildə şikəst edilib ki,onların da 76 nəfəri uşaqlar idi. 8 ailə tamamilə məhv edilib, 25 uşaq hər iki valideynini və 130 uşaq isə bir valideynini itirib.
Sonra rayon icra hakimiyyəti başçısı aparatında Yetkinlik yaşına çatmayanların işləri və hüquqlarının müdafiəsi üzrə komisyanın uşaqlarla iş üzrə məsləhətçi psixoloqu Pərişan Orucova, YAP rayon təşkilatının əməkdaşı Əli Paşayev, Qarabağ Regional Gənclər və İdman İdarəsinin Gənclərlə iş sektorunun müdiri Orxan Fəxrəddinov, Tərtər Peşə Məktəbinin tələbəsi Aytən Quluzadə, fəal gənclərdən Əsmər Yusifli çıxış ediblər. Çıxışlarda Xocalı faciəsinə ilk dəfə Ulu Öndər tərəfindən düzgün siyasi qiymət verilməsindən, 2008-ci ildən başlayaraq Heydər Əliyev Fondunun vitse-prezidenti Leyla Əliyevanın təşəbbüsü ilə Xocalı soyqırımının dünya ictimaiyyətinə çatdırılması məqsədilə “Xocalıya ədalət” adlı beynəlxalq kampaniya keçirilməsindən, Heydər Əliyev Fondunun Avropa, Asiya, Afrika, Şimali və Cənubi Amerikanın bir sıra ölkələrində Xocalı soyqırımı ilə bağlı tədbirlər təşkil etməsindən və bu istiqamətdə aparılan işlərdən də söhbət açılıb.
Çıxışçılar Xocalıda dinc əhalinin qəddarlıqla qətlə yetirilməsini pisləyib, Azərbaycan xalqına qarşı törədilən cinayətin təşkilatçılarının məsuliyyətə cəlb olunmasının vacibliyini vurğulayıblar.
Qeyd olunub ki, Azərbaycan Respublikasının Prezidenti cənab İlham Əliyevin səriştəsi, uzaqgörən siyasəti sayəsində nəhayət ki, torpaqlarımız 30 ildən sonra 44 günlük Vətən müharibəsində işğaldan azad edilib, işğalçılar layiqli cəzalarını alıblar.
Tərtər Peşə Məktəbinin tələbələri Fidan Həsənli və Fəxriyyə Budaqova Xocalıya aid şeirlər söyləyiblər.
Sonra Xocalı soyqrımına həsr olunmuş film nümayiş etdirilib.
