Tərtərdə Xocalı faciəsi qurbanlarının xatirəsinə həsr olunmuş şahmat yarışı keçirilib

Tərtər rayon icra hakimiyyətinin, YAP rayon təşkilatının, Tərtər Təhsil Sektorunun və Uşaq-Gənclər İdman-Şahmat Məktəbinin birgə təşkilatçılığı ilə Xocalı soyqırımı qurbanlarının xatirəsinə həsr olunan məktəblilər arasında şahmat üzrə rayon birinciliyi keçirilib.

Əvvəlcə Xocalı faciəsi qurbanlarının xatirəsi bir dəqiqəlik sükutla yad edilib.

Tədbirdə iştirak edən rayon icra hakimiyyəti aparatının Yetkinlik yaşına çatmayanların işləri və hüquqlarının müdafiəsi üzrə komisyanın məsul katibi Rəvan Həsənov, YAP rayon təşkilatının nümayəndəsi Gündüz Alıkişiyev, Uşaq-Gənclər İdman-Şahmat Məktəbinin direktoru Fərəc Rzayev iştirakçılara soyqırımının səbəbləri və ağır nəticələri barədə məlumat veriblər. Bildirilib ki, qanlı faciədən 33 il ötür. 1992-ci il fevralın 25-dən 26-na keçən gecə Ermənistan silahlı qüvvələri Xocalı şəhərini mühasirəyə alaraq bütün beynəlxalq hüququ, o cümlədən beynəlxalq humanitar hüquq normalarını pozaraq şəhərin dinc əhalisinə misli görünməmiş qəddarlıqla divan tutublar. 613 nəfər, o cümlədən 106 qadın, 63 uşaq və 70 ahıl insan qəddarlıqla öldürülüb. Habelə, 487 dinc sakin ağır yaralanıb, 1275 nəfər girov götürülüb.

Qeyd olunub ki, Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində tarixi qələbə qazanıb, torpaqlarımızın düşmən tapdağından azad edilib, soyqırım qurbanları və şəhidlərimizin qisası artıq alınıb və xocalılar öz yurd-yuvalarına qayıdırlar.

Azərbaycan xalqı erməni silahlı birləşmələrinin törətdikləri  Xocalı soyqrımını heç vaxt unutmayacaq.

Sonra yarışlara start verilib. Birincilikdə  60 nəfər şahmatçı iştirak edir. Yarış 3 gün davan edəcək. I, II və III yerlərə layiq görülən şahmatçılar qiymətli hədiyyələr və fəxri fərmanlarla mükafatlandırılacaqlar.