Tərtərdə “Konstitutsiya və Suverenlik İli” çərçivəsində 8 mart Beynəlxalq Qadınlar Günü münasibəti ilə “Heydər Əliyev və Azərbaycanda dövlət qadın siyasəti” mövzusunda tədbir keçirilib
Tərtər Rayon İcra Hakimiyyəti və YAP rayon təşkilatının birgə təşkilatçılığı ilə “Konstitutsiya və Suverenlik İli” çərçivəsində 8 mart Beynəlxalq Qadınlar Günü münasibəti ilə “Heydər Əliyev və Azərbaycanda dövlət qadın siyasəti” mövzusunda tədbir keçirilib.
Tədbirdə Tərtər Rayon İcra Hakimiyyətini başçısının birinci müavini Elvin Umudov, YAP Tərtər rayon təşkilatının sədri Eldar Əsədov və rayonun ictimai-siyasi həyatında fəallıq göstərən qadınlar iştirak ediblər.
Əvvəlcə Ümummilli Liderin və torpaqlarımızın suverenliyi uğrunda canlarını qurban vermiş şəhidlərin ruhu bir dəqiqəkil sükutla yad edilib.
Sonra Tərtər Rayon İcra Hakimiyyəti başçısının birinci müavini Elvin Umudov icra hakimiyyəti başçısı Müstəqim Məmmədovun tərtərli qadınlara ünvanladığı təbriki çatdırıb, 8 mart Beynəlxalq Qadınlar Günü münasibəti ilə onları təbrik edib, uzun ömür,can sağlığı və işlərində müvəffəqiyyətlər arzu edib.
Qeyd olunub ki, Heydər Əliyevin Fərmanı ilə 1998-ci ildə Qadın Problemləri üzrə Dövlət Komitəsi yaradılıb ki, komitə qadın hüquqlarının müdafiəsi istiqamətində müstəsna əhəmiyyətli işlər görüb, mühüm tədbirlər həyata keçirib. Ulu Öndərin iştirakı ilə1998-ci ildə Azərbaycan Qadınlarının I qurultayı, 2003-cü ildə isə II qurultayı keçirilib.
1998-ci ilə Ümummilli Liderin imzaladığı “Azərbaycanda qadınların rolunun artırılması haqqında” Fərman hər mənada qadınların fəallığına, cəmiyyətdə öz yerlərini tutmalarına çox böyük dəstək olub. Ulu Öndərin 2000-ci ildə imzaladığı “Azərbaycan Respublikasında dövlət qadın siyasətinin həyata keçirilməsi haqqında” Fərmanı isə ölkədə qadın siyasətini daha da gücləndirib. Həmin ilin iyununda Nazirlər Kabineti “Azərbaycan Respublikasında qadın məsələləri üzrə 2000-2005-ci illər üçün Milli Fəaliyyət Planı”nı qəbul edib. Bu proqram milli prioritetləri nəzərə alaraq, Pekin Strategiyası əsasında hazırlandı. Proqram siyasət, iqtisadiyyat, sosial, mədəniyyət, təhsil və səhiyyə sahələrini, eləcə də qaçqın və məcburi köçkün qadınların problemlərini əhatə edirdi. Milli Fəaliyyət Planının müddəalarının həyata keçirilməsində həm dövlət strukturlarının, həm də QHT-lərin iştirakı nəzərdə tutulurdu.
Heydər Əliyevin geniş və uğurlu dövlət qadın siyasəti həm ölkə daxilində, həm də xaricdə özünü büruzə verirdi və xarici təcrübə öyrənilərək tətbiq edilirdi. Azərbaycan bir sıra beynəlxalq təşkilatlara qoşularaq onların qadın məsələlərini əhatə edən konvensiyalarını, protokollarını qəbul etmiş və qanunvericiliyimizdə qadınların hüquqları mövzusunu təkmilləşdirib.
Ümummilli Lider Heydər Əliyev tərəfindən dövlət qadın siyasətinin həyata keçirilməsi onun imzaladığı fərman və sərəncamlarda, xüsusilə “Qadınlara qarşı ayrı-seçkiliyin bütün formalarının ləğv olunması haqqında” Konvensiyanın ratifikasiya edilməsində və bu Konvensiyaya Əlavə Protokolun imzalanmasında öz əksini tapıb.
Sonra YAP rayon təşkilatının Eldar Əsədov çıxış edib, Prezident İlham Əliyevin rəhbərliyi ilə Azərbaycanda dövlət qadın siyasətinin yüksəliş mərhələsinə qədəm qoyduğu bildirilib Qeyd olunub ki, təsadüfi deyil ki, Azərbaycan gender siyasətinin reallaşdırılması məsələsində də öncül ölkələrdən biridir. Birinci vitse-prezident, Heydər Əliyev Fondunun prezidenti Mehriban xanım Əliyeva öz geniş fəaliyyəti ilə beynəlxalq aləmdə Azərbaycan qadınının nüfuzunu daha da yüksəklərə qaldırır. Fəxrlə deyə bilərik ki, bu gün Mehriban xanım Əliyevanın simasında dünya dövlətlərinə dərin bilik və intellekt sahibi olan gözəl ziyalı, peşəkar siyasətçi, humanist Azərbaycan qadını obrazı təqdim olunur.
Tədbir iştirakçıları “Heydər Əliyev və qadın siyasəti” adlı sənədli filmi izlədikdən sonra rayonun ictimai-siyasi həyatında fəal iştirak edən bir qrup qadına fəxri fərman,qiymətli hədiyyələr və gül buketləri təqdim olunub.
Şəhid bacısı Ziyafət Rüstəmova tərtərli qadınlar adından göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlığını bildirib.
