Tərtərdə “Konstitusiya və Suverənlik İli”çərçivəsində “Narkomaniyaya yox deyək! ” və “Sağlam həyat tərzi” mövzusunda tədbir keçirilib
Vüqar Məmmədov adına Səhləbad kənd tam orta məktəbdə keçirilən tədbirdə Tərtər Rayon İcra Hakimiyyəti Başçısı aparatında Yetkinlik yaşına çatmayanların işləri və hüquqlarının müdafiəsi üzrə komissiyanın məsul katibi Rəvan Həsənov, Tərtər rayon Polis şöbəsinin İTB-nin Yetkinlik yaşına çatmayanların proflaktiki işinin təşkili qrupunun baş inspektoru İlham Rəhimli, Tərtər Rayon Mərkəzi Xəstəxanasının psixoloqu Hətəm Nuruzadə, məktəbin direktoru Xəyal Aslanov, müəllim kollektivi və şagirdlər iştirak ediblər.
Tədbirdə dövrümüzün bəlası olan narkomaniyanın insanlara vurduğu maddi və mənəvi zərərlərdən danışılıb. Çıxışçılar şagirdlərə diqqətli olmağı, narkotik aludəçisinə çevrilmiş şəxslərdən uzaq durmağı tövsiyə ediblər. Son illərdə bu istiqamətdə aparılan genişmiqyaslı maarifləndirici tədbirlərin əhəmiyyəti qeyd edilib.
Həmçinin çıxış edənlər tərəfindən gənc nəslə sağlam həyat tərzinə üstünlük vermələri tövsiyə olunub. Onlara hər gün fiziki aktivliyə vaxt ayırmaq, sağlam qidalanmaq və gigiyena qaydalarına riayət etmək məsləhət görülüb
Tədbirin sonunda iştirakçıları maraqlandıran suallar cavablandırılıb.
