Tərtərdə “Konstitusiya və Suverənlik İli”çərçivəsində “Erkən nikah və qohumlar arasında nikahın qarşısının alınması” və “Ailə dəyərlərinin möhkəmləndirilməsi və inkişafı” mövzusunda tədbir keçirilib
Adil Həsənov adına Buruc kənd tam orta məktəbdə keçirilən tədbirdə Tərtər Rayon İcra Hakimiyyəti Başçısı aparatının Yetkinlik yaşına çatmayanların işləri və hüquqlarının müdafiəsi üzrə komisyanın məsul katibi Rəvan Həsənov, Tərtər rayon Polis şöbəsinin İTB-nin Yetkinlik yaşına çatmayanların proflaktiki işinin təşkili qrupunun baş inspektoru İlham Rəhimli, Tərtər Rayon Mərkəzi Xəstəxanası ASM Şöbəsi həkimi-terapevt Aytəkin Paşayeva, məktəbin direktoru Niyaməddin Aslanov, müəllim kollektivi, valideyinlər və şagirdlər iştirak ediblər.
Çıxış edənlər erkən nikahın gənclərə, ailələrə, bütövlükdə cəmiyyətə vurduğu zərərlər, bu sosial problemin aradan qaldırılması yolları haqqında danışılaraq bildiriblər ki, erkən nikah hallarına zəmin yaradan əsas səbəblərdən birincisi təhsildən yayınmaqdır. Valideynlərin maddi imkansızlıq bəhanəsi ilə övladlarını məktəbdən uzaqlaşdırması son nəticədə erkən nikaha yol açır. Bunun qarşısının alınması üçün ardıcıl maarifləndirmə tədbirlərinin aparılması zəruridir.
Həmçinin Ailə dəyərlərinin möhkəmləndirilməsi və inkişafı mövzusunda bildirilib ki, Azərbaycan ailəsi milli adət-ənənələrimizi yaşatmalı, övladlarımız milli-mənəvi dəyərlərimiz ruhunda tərbiyə olunmalıdırlar. Cəmiyyətin inkişafı ailənin rifahından, ailədaxili sağlam mənəvi mühitdən, ailə münasibətlərinin yüksək əxlaqi dəyərlər əsasında təşkilindən çox asılıdır. Cəmiyyətin və dövlətin tərəqqisində xüsusi rolu olan ailə öz bütövlüyünü qoruyub saxlayır.
Tədbirin sonunda iştirakçıları maraqlandıran suallar cavablandırılıb və iştirakçılara “erkən nikah və qohumlar arasında nikahın qarşısının alınması”, “Ailə dəyərlərinin möhkəmləndirilməsi və inkişafı” və “Gənc ailələrə tövsiyyələr” adlı məlumatlandırıcı bületeyinlər paylanılıb.
