Tərtərdə “Konstitusiya və Suverenlik İli” çərçivəsində Beynəlxalq Azərbaycan Muğamı günü münasibəti ilə tədbir keçirilib
Avqustun 26-sı Beynəlxalq Azərbaycan Muğamı Günü və İpək Yolu üzərində yerləşən ölkələrin musiqisi günü kimi qeyd olunur. 2010-cu ildə Kanadanın Niaqara şəhərinin meriyası və ənənəvi olaraq hər il keçirilən Beynəlxalq Niaqara musiqisi festivalının rəhbərliyi tərəfindən qəbul olunan bu qərar xalqımızın milli sərvəti olan muğamın bəşəri musiqiyə çevrildiyini bir daha təsdiq edir. Bu tarix muğamsevərlər, ömrünü bu sənətin yaşamasına və təbliğinə həsr edənlər üçün ən əziz bayramdır.
Bu münasibət ilə Tərtər Rayon İcra Hakimiyyəti, YAP Tərtər Rayon Təşkilatı və Mədəniyyət Mərkəzinin birgə təşəbbüsü ilə mədəniyyət evində yerli muğam ifaçılarının iştirakı ilə tədbir keçirilib. Tədbirdə çıxış edən Tərtər RİH başçısı aparatında İctimai-siyasi və humanitar məsələlər şöbəsinin müdir müavini Zabil Paşayev, Tərtər Rayon Mədəniyyət Mərkəzinin direktoru Ehtibar Əhmədov, YAP rayon Təşkilatının əməkdaşı Əli Paşayev, Hacıqərvənd kənd Mədəniyyət evinin müdiri Lalə Hacıyeva, Tərtər Uşaq Musiqi Məktəbinin müəllimi Nərgiz Balakişiyeva çıxış edərək muğamsevərləri təbrik ediblər.
Qeyd olunub ki, Azərbaycan muğamının müasir tarixində ölkəmizin birinci xanımı, Birinci vitse-prezident, Heydər Əliyev Fondunun prezidenti Mehriban xanım Əliyevanın rəhbərliyi ilə həyata keçirilən çoxşaxəli silsilə tədbirlər müstəsna rol oynayır. Bu fəaliyyətin nəticəsidir ki, son illər muğam ifaçılığı ən müxtəlif aspektlərdən hərtərəfli dəstək alaraq, sözün əsl mənasında, intibah dövrünü yaşayır. UNESCO-nun qərarı ilə dünya mədəniyyətinin qeyri-maddi irsinin bəşəri əhəmiyyətə malik sərvətləri sırasına daxil edilməsi muğamın, tar ifaçılığı sənətinin təkcə xalqımızın deyil, bütün bəşəriyyətin misilsiz mədəni sərvətinin ayrılmaz hissəsi kimi qiymətləndirilməsidir.
Ölkəmizdə "Muğam aləmi" Beynəlxalq muğam festivallarının, müsabiqələrin, muğam konsertlərinin, simpoziumların təşkili, "Qarabağ xanəndələri" albomunun buraxılması, "Muğam" jurnalının, "Muğam ensiklopediyası"nın nəşri, müasir texnologiyalara əsaslanan və 8 diskdən ibarət "Azərbaycan muğamı" multimedia toplusunun hazırlanması Heydər Əliyev Fondunun, Azərbaycan Mədəniyyət Fondunun bu sahəyə göstərdiyi diqqətə bariz nümunələrdəndir.
Tədbirdə Azərbaycan muğamlarına həsr olunmuş film nümayiş etdirilib. Sonra söz muğam ifaçılarına verilib. Onların rəngarəng çıxışları tamaşaçılara böyük zövq verib.
