Tərtərdə “Bələdiyyə seçkilərində qadınların fəallığının yüksəldilməsi”mövzusunda tədbir keçirilib

21 yanvar 2025-ci il tarixində Tərtər rayonunda Ailə Qadın və Uşaq Problemləri üzrə Dövlət Komitəsi, Mərkəzi Seçki Komissiyası və “Bərabər İnkişaf Naminə” Koalisiyanın birgə əməkdaşlığı ilə “Bələdiyyə seçkilərində qadınların fəallığının yüksəldilməsi” mövzusunda növbəti tədbir keçirilib. Tədbirdə çıxış edən Tərtər Qadın Resurs Mərkəzinin Koordinatoru, “Bərabər İnkişaf Naminə” Koalisiyanın Tərtər Rayonu üzrə nümayəndəsi Qumru Şəmilova ölkəmizdə 29 yanvar 2025-ci il tarixində keçiriləcək Bələdiyyə seçkilərində qadınları fəal iştiraka dəvət edib.

97 saylı Tərtər-Ağdərə-Goranboy Seçki Dairəsində Dairə Seçki komissiyasının katibi Çiçək Ələsgərova seçkiyə hazırlıq prosesi və seçki prosedurları haqqında məlumat verərək, bu kampaniyada qadınların fəal iştirakının əhəmiyyətini vurğulayıb.

2019-cu ildə Tərtər Şəhər Bələdiyyəsinin sədri seçilmiş Tünzalə Vəliyeva öz çıxışında qadınların içtimai-sosial həyatda aktivlik göstərməsinin xüsusilə əhəmiyyətli olduğunu diqqətə çatdırıb.

Tədbirdə Tərtər Qadın Resurs Mərkəzinin üzvü olan bir qrup sahibkar qadın çıxış edib.

Mərkəzdən dəstək alaraq sahibkarlıq fəaliyyətilə məşğul olan qadınlardan dərzi Məlahət İbrahimova, südçülük üzrə qalib olmuş Gülümzər Zülqədərli, quşçuluq üzrə qalib Şahnaz Sadıxova, Xatirə Aslanova, tingçilik biznesi üzrə qalib Turanə  Kərimova, arıçılıq biznesi üzrə qalib Dilguşə Mədətova və Tünzalə Qaraşova,  ingilis dili üzrə repetitorluq fəaliyyəti göstərən Rövşanə İsgəndərova çıxış edərək Tərtər rayon qadınlarının fəallığından bəhs ediblər.

60 nəfərin iştirak etdiyi tədbirin yekununda müzakirələr aparılaraq, təkliflər dinlənilib.