Tərtər Rayon İcra Hakimiyyətinin əməkdaşları şəhid İlham Nəcəfovun atası Hüseyn Nəcəfovun yas mərasimində iştirak ediblər
Tərtər Rayon İcra Hakimiyyəti başçısının birinci müavini Elvin Umudov Qafqaz Müsəlmanları idarəsinin səlahiyyətli nümayəndəsi, Tərtər Cümə Məscidinin imamı Sadiq Cəfərov və aparatın məsul əməkdaşları ilə birlikdə Tərtər şəhərində Birinci Qarabağ müharibəsi şəhidi Nəcəfov İlham Hüseyn oğlunun atası Nəcəfov Hüseyn Hacıislam oğlunun yas mərasimində iştirak edib, mərhumun ailə üzvlərinə başsağlığı verib.
Qeyd edək ki, İlham Nəcəfov 1972-ci il noyabr ayının 22-də Tərtər şəhərində anadan olmuşdur. Orta təhsilini şəhər 6 №-li orta və 96 №-li Texniki Peşə Məktəblərində almışdır. 1990-cı ildə keçmiş Sovet Ordusu sıralarına həqiqi hərbi xidmətə çağırılmışdır. SSRİ dağıldıqdan sonra xidmətini yarımçıq qoyub vətənə qayıtmış və 1992-ci ildən hərbi xidmətini “Tərtər özünümüdafiə batalyonu”nda davam etdirmişdir. Bu batalyonun tərkibində Ağdərə bölgəsində erməni işğalçılarına qarşı aparılan döyüşlərdə iştirak etmişdir. 2 sentyabr 1992-ci ildə Ağdərə bölgəsinin Drambon kəndi uğrunda gedən döyüşlərdə ağır yaralanıb və Bakıya hərbi hospitala müalicəyə göndərilmişdir. Lakin aldığı qəlpə yarasından həmin il oktyabr ayının 13-də vəfat etmişdir.
Subay idi. Tərtər şəhər qəbiristanlığında dəfn olunub.
Mərhumun yaxınları şəhid ailələrinə göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
