Rayonun Azad Qaraqoyunlu kənd tam orta məktəbində 8 noyabr-Zəfər Günü münasibəti ilə qazi və müharibə veteranları ilə görüş keçirilib
Tərtər rayonunun Şükür Rəhimov adına Azad Qaraqoyunlu kənd tam orta məktəbində 8 noyabr-Zəfər Günü münasibəti ilə qazilərlə görüş keçirilib.
Görüşdə məktəbin müəllim və şagird kollektivi ilə birlikdə rayon Təhsil sektorunun, kənd inzibati ərazi dairəsi nümayəndəliyinin, Azərbaycan Vətən Müharibəsi Veteranları İctimai Birliyinin Regional şöbəsinin əməkdaşları, qazilər və veteranlar iştirak ediblər.
Tədbirdə əvvəlcə Ümummilli Lider Heydər Əliyevin və torpaqların suverenliyi uğrunda canlarını qurban vermiş şəhidlərin xatirəsi bir dəqiqəlik sükutla yad edilib.
Sonra məktəbin direktoru Yeganə Mehdiyeva çıxış edərək 44 günlük Vətən müharibəsində qazanılan möhtəşəm qələbədən, sentyabrın 19-da işğaldan azad edilmiş ərazilərdə aparılan antiterror əməliyyatlarından, yenilməz sərkərdə Ali Baş Komandan İlham Əliyevin Xankəndinin mərkəzində Azərbaycan Bayrağını dalğalandıraraq etdiyi möhtəşəm çıxışından danışıb. Qeyd olunub ki, bu qələbəni bizə Ali Baş Komandan Cənab İlham Əliyevin komandanlığı altında Vətən üçün canını qurban vermiş oğullarımız, öz sağlamlıqlarını itirmiş qazilərimiz, mühaibənin dəhşətlərini görmüş veteranlarımız yaşadıb.
Sonra söz tədbirə dəvət olunmuş qazi və veteranlara verilib. Azərbaycan Vətən Müharibəsi Veteranları İctimai Birliyinin Regional şöbəsinin sədri Vidadi Məmmədzadə, Vətən müharibəsi qazisi Sadıx Abbaslı, Birinci Qarabağ müharibəsi qazisi Şöhrət Zeynalov və başqaları çıxış ediblər. Çıxış edənlər bildiriblər ki, qazanılan qələbə Heydər Əliyev siyasətinin, onun siyasi kursunun ən layiqli davamçısı Cənab İlham Əliyevin daxili və xarici siyasətinin qələbəsi, Azərbaycan Ordusunun gücü və qüvvəti sayəsində əldə olunub. Şanlı Zəfərimizi təmin edən vətən oğulları öz qanları bahasına tarix yazıblar. Qazilər və veteranlar öz döyüş xatirələrini tədbir iştirakçıları ilə bölüşüblər.
Tədbirin sonunda xatirə şəkilləri çəkilib.
