Rayon rəhbəri Soyulan kəndində şəhid Şəmilov Azərin ailəsində olub
Tərtər Rayon İcra Hakimiyyətinin başçısı Müstəqim Məmmədov Soyulan kəndində şəhid Şəmilov Azərin ailəsində olub, onların problemləri və qayğıları ilə maraqlanıblar.
Görüşdə rayon rəhbəri 44 günlük Vətən müharibəsində Tərtərli oğulların döyüşlərdə göstərdiyi sücaətlərdən söhbət açıb, hər birinin qısa, lakin mənalı ömür yolunun gənclərə örnək olduğunu bildirib. Qarabağı görməyən gənclərin qəhramanlığı, peşakar döyüşçü olmaları sayəsində Müzəffər Ali Baş Komandanın rəhbərliyi altında torpaqlarımızın işğaldan azad olunduğunu, belə igid oğullar böyütdükləri üçün şəhid valideyinləri qarşısında baş əydiyini bildirib. Qazanılan tarixi zəfərdən sonra işğaldan azad olunmuş torpaqlarda aparılan nəhəng quruculuq işlərindən söhbət açıb. Rayon rəhbəri dövlətimizin başçısı cənab İlham Əliyev və Birinci vitse-prezident Mehriban xanım Əliyevanın hər zaman şəhid ailələrinə diqqət və qayğı ilə yanaşdığını, dövlət başçısının hər kəsə şəhid və qazi ailələrinin problemlərinə həssaslıqla yanaşmağı tapşırdığını bildirib.
49 yaşlı tibb xidməti baş leytenantı Azər Şəmilov Tərtər rayonunun Hacallı kəndində anadan olub. O, 2020-ci ilin sentyabr ayında təlimlərə cəlb olunub və müharibə başlayandan ön cəbhədə Tərtər rayonunun Suqovuşan, Talış kəndləri istiqamətlərində xidmət edib, yüzlərlə yaralıya ilkin tibbi yardım göstərib.
O, 14 oktyabr 2020-ci il tarixdə qucağında tibbi yardım göstərdiyi yaralı ilə birgə Suqovuşan istiqamətində gedən döyüşlərdə şəhid olub və Bərdə rayonunun Kələntərli kəndində dəfn olunub.
Ölümündən sonra Azər Şəmilov Azərbaycan Respublikası Prezidentinin müvafiq Sərəncamları ilə 3-cü dərəcəli “Rəşadət” ordeni, “Vətən uğrunda”, “Suqovuşanın azad olunmasına görə” və “Hərbi xidmətlərə görə” medalları ilə təltif olunub.
Şəhidin ailə üzvləri onlara göstərilən diqqət və qayğıya görə Azərbaycan Respublikası Prezidenti cənab İlham Əliyevə və Birinci vitse-prezident Mehriban xanım Əliyevaya öz minnnətdarlıqlarını bildiriblər.
