Rayon rəhbəri şəhid Elşad Abbaszadənin ailəsini ziyarət edib

Tərtər Rayon İcra Hakimiyyəti başçısı Müstəqim Məmmədov Səfərbərlik və Hərbi Xidmətə Çağırış üzrə Dövlət Xidmətinin  rayon şöbəsinin rəisi Pərviz Hüseynov, YAP rayon təşkilatının sədri Eldar Əsədov,   birlikdə rayonunun Kəngərli  kəndində şəhid  Abbaszadə Elşad Raquf oğlunun ailəsində olub, ailənin qayğıları ilə maraqlanaraq, Vətənə Elşad  kimi igid oğul bəxş etdikləri üçün minnətdarlığını bildirib.

Görüşdə şəhid Quluzadə Elminin atası Quliyev Şəmsi Əliqan oğlu, şəhid Mənsimli İntiqamın atası  Məmmədov Rövşən Mənsim oğlu, şəhid Məmmədov Səbuhinin atası Məmmədov Zahid Mənsim oğlu, şəhid Qənbərli Qənbərin atası Qasımov Bəhruz Qənbər oğlu, şəhid Abbaszadə Eminin atası Abbasov Faiq Yaqub oğlu, şəhid Baxışlı Baxışın atası Bağırov Elşən Baxış oğlu iştirak ediblər.

Elşadın keçdiyi döyüş yolundan danışan rayon rəhbəri  onun qısa, lakin mənalı ömür yolunun gənclərə vətənpərvərlik hisslərinin aşılmasında mühüm rol oynadığını bildirib.

Qeyd olunub ki, Elşad Abbaszadə 1993-cü ilin 14 iyulunda Kəngərli kəndində anadan olub. 2011-ci ilin iyul ayında hərbi xidmətə çağırılıb. 2013-cü ildə hərbi xidmətini başa vurub. 2014-cü ildən müddətdən artıq xidmət etmək üçün yenidən hərbiyə qayıdıb.

Elşad Abbaszadə tağım komandiri olub. Özü də gözəl pulemyotçu idi. O, 2016-cı il martın 25-də qoşunların təmas xəttində  ermənilərin atəşkəs rejimini pozması nəticəsində qəhrəmancasına şəhid olub. Elşad Abbaszadənin şəhid olmasından 7 gün sonra, aprelin  2-sində  Azərbaycan-Ermənistan  təmas xəttində 24 ildən sonra tariximizin ən qanlı atışmalarından biri, Aprel döyüşləri başlayıb.

Ölümündən sonra Elşad Abbaszadə  “Hərbi xidmətdə fərqlənməyə görə” III dərəcəli medalı ilə təltif edilib.

Elşad Abbaszadə doğma kəndinin qəbiristanlığında torpağa tapşırılıb.

Elşadın atası Raquf kişi Qarabağ müharibəsi veteranıdır. O, deyir ki, Elşad deyirdi ki, sizin başa çatdıra bilmədiyiniz işləri biz Qələbə ilə başa çatdıracaq, torpaqlarımızı işğaldan azad edəcəyik.

Azərbaycanın Elşad kimi igid oğulları Ali Baş Komandanın rəhbərliyi ilə Elşadın arzusunu yerinə yetidilər. Ölkə rəhbəri öz əlləri ilə Azərbaycan Bayrağını İşğaldan azad edilmiş, terrorçulardan təmizlənmiş Xankəndində, Ağdərədə, Xocalıda, Xocavənddə dalğalandırdı

Şəhidin ailə üzvləri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz  minnnətdarlıqlarını bildiriblər.

Allah bütün şəhidlərmizə rəhmət, qazilərimizə, veteranlarımıza isə can sağlığı  versin!