Rayon rəhbəri şəhid atası Əsgər Abbasovu ziyarət edib

Tərtər Rayon İcra Hakimiyyətinin başçısı Müstəqim Məmmədov rayonun Seydimli  kəndində Vətən müharibəsi şəhidi Abbasov Aysənan Əsgər oğlunun ailəsini ziyarət edib

O, Bakı şəhərində Mərkəzi klinikada ürəyindən müalicə alaraq ailəsinə dönən şəhid atası Əsgər kişinin səhhətilə maraqlanıb, onu 65 illik yubleyi münasibətilə təbrik edib, şəhidin valideyinlərinə Aysənan kimi igid bir oğul böyütdükləri üçün təşəkkürünü bildirib.

Qeyd edək ki, Aysənan Abbasov  1992-ci ilin iyun ayının 26-da Tərtər rayonunun Seydimli kəndində anadan olub. O, 2014-cü ilin dekabr ayının 27-də hərbi xidmətə çağırılmışdır. Hərbi xidməti başa vurduqdan sonra müddətdən artıq həqiqi hərbi xidmət hərbi qulluqçusu olaraq hərbi xidmətini davam etdirib.

Azərbaycan Ordusunun müddətdən artıq həqiqi hərbi xidmət hərbi qulluqçusu olan Aysənan Abbasov 2020-ci il sentyabr ayının 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib, Suqovuşanın azadlığı uğrunda gedən döyüşlərdə vuruşub. Aysənan Abbasov 30 sentyabr 2020-ci ildə Suqovuşan döyüşləri zamanı şəhid olub. O, Tərtər rayonunun Seydimli kəndində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin müvafiq Sərəncamlarına əsasən Aysənan Abbasov ölümündən sonra üçüncü dərəcəli “Vətənə xidmətə görə” ordeni, “Cəsur döyüşçü”, “Vətən uğrunda” və “Suqovuşanın azad olunmasına görə” medalları ilə təltif edilib.

Ailəli idi onun 2 övladı yadigar qalıb.

Şəhidin ailə üzvləri onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.