Rayon rəhbəri bir qrup gənclə görüşüb

Dekabırın 26-da YAP rayon təşkilatının qərargahında Tərtər rayon İcra Hakimiyyətinin təşkilatçılığı ilə bir qrup gənclə görüş keçirilib.

Görüşdə Tərtər rayon İcra Hakimiyyətinin başçısı Müstəqim Məmmədov, başçının  birinci müavini Elvin Umudov, Qarabağ Regional Təhsil İdarəsinin Tərtər rayon üzrə Təhsil sektorunun müdiri Oqtay Sarıkişiyev, YAP rayon təşkilatının sədri Eldar Əsədov və Gənclər və İdman İdarəsinin rəis müavini Şəhram Quluyev iştirak ediblər.

Əvvəlcə iştirakçılar Ulu Öndər Heydər Əliyevin və  Azərbaycanın ərazi bütövlüyü uğrunda canından keçərək şəhidlik zirvəsinə ucalan qəhrəmanlarımızın xatirəsini bir dəqiqəlik sükutla anıblar. 

Tədbirdə çıxış edən rayon rəhbəri əvvəlcə gəncləri qarşıdan gələn 31 Dekabr-Dünya Azərbaycanlılarının Həmrəylik Günü və Yeni il münasibəti ilə təbrik edib, onlara gələcək fəaliyyətlərində uğurlar arzulayıb. Ölkəmizdə həyata keçirilən gənclər siyasətinin Azərbaycan gəncliyinin hərtərəfli inkişafına və ictimai-siyasi həyatda fəal iştirakının təmin olunmasına yönəldiyini vurğulayaraq Ulu Öndərin əsasını qoyduğu bu siyasətin hazırda Azərbaycan Respublikasının Prezidenti cənab İlham Əliyev tərəfindən uğurla davam etdirildiyini söyləyib. Bu gün ölkəmizdə vətənpərvər, savadlı, yenilikçi gənclərin olduğunu qeyd edən rayon rəhbəri Azərbaycanda dövlət səviyyəsində gənclərlə bağlı bir sıra proqramların və layihələr həyata keçirildiyini nəzərə çatdırıb. 

Tədbirdə gənclərdən Könül Mehtiyeva, Cəbrayı Rüstəmzadə, Nigar Qurbanzadə, Təhminə Mayılzadə və Bəhriyyə Əhmədova çıxış edərək Azərbaycan gənclərinin müasir, inkişaf etmiş, yüksək intellektli aparıcı qüvvə kimi formalaşmasında dövlətimizin apardığı gənclər siyasətinin rolundan bəhs edib, onlara göstərilən diqqət və qayğıya görə möhtərəm Prezident cənab İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.

Sonda qarşılıqlı fikir mübadiləsi aparılıb, gəncləri düşündürən məsələlərə aydınlıq gətirilib.