Milli Məclisin deputatı Xanlar Fətiyev Tərtər rayonunun Mamırlı və Köçərli kəndlərində vətəndaşları qəbul edib

Milli Məclisin deputatı Xanlar Fətiyev deputat seçildiyi 98 saylı Bərdə-Tərtər seçki dairəsi üzrə Tərtər rayonunun Mamırlı və Köçərli kəndlərində vətəndaş qəbulu keçirib.

Qəbulda Tərtər Rayon İcra Hakimiyyəti başçısının birinci müavini Elvin Umudov da iştirak edib. 

Vətəndaşlarla fərdi qaydada keçirilən görüşdə sakinlər tərəfindən əsasən işlə təmin olunma, maddi yardım, Mamırlı və Poladlı kəndlərarası avtomobil yolunun dağılmış 1 km-lik hissəsinin təmir olunması, Poladlı kəndində olan suvarma kanallarının təmizlənməsi, Köçərli kəndində suvarma məqsədi ilə qazılması nəzərdə tutulan suvartezian quyusunun qazılması işlərinin tezləşdirilməsi, Köçərli kəndində içməli su üçün subartezian quyusunun qazılmsı və digər şəxsi məsələlər barədə müraciətlər edilib. Müraciətlərin bir qismi yerində həll olunub, millət vəkilinin səlahiyyətlərinə aid olmayan məsələlər isə tədbirlərin görülməsi məqsədilə nəzarətə götürülüb.

Qəbula gələnlər onların müraciətlərinin dinlənilməsindən razılıqlarını ifadə edərək ölkədə, o cümlədən Tərtər rayonunda həyata keçirilən müxtəlif sosial layihələrə görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya sonsuz minnətdarlıqlarını bildiriblər.