İcra başçısı uşaqların Novruz şənliyində iştirak edib

Respublikamızın hər yerində olduğu kimi, rayonumuzda da Novruz bayramı təntənə ilə qeyd olunur. Rayonun bütün idarə və müəssisələrində, təhsil ocaqlarında Novruz bayramına həsr olunmuş tədbirlər keçirilir.

Novruz bayramı münasibəti ilə növbəti tədbir şəhər 5 nömrəli körpələr evi-uşaq bağçasında keçirilib.

Tədbirdə Tərtər Rayon İcra Hakimiyyətinin başçısı Müstəqim Məmmədov, YAP Tərtər Rayon Təşkilatının sədri Eldar Əsədov, Qarabağ Region Təhsil İdarəsinin Tərtər Təhsil Sektorunun müdiri Oktay Sarıkişiyev, Milli Məclisin deputatı Anar Məmmədovun köməkçisi Elçin Cahangirov, 5 nömrəli körpələr evi-uşaq bağçasın kollektivi və valdeyinlər iştirak ediblər.

Bağçanın həyəti xalça-palazla döşənib. Novruz atributları-səməni, bayram xonçaları ilə bəzədilib. Süfrələrə kətə, qovurğa, yuxa qoyulub. Bir sözlə bağçada əsl bayram əhval-ruhiyyəsi yaşanıb.

Qarabağ Region Təhsil İdarəsinin Tərtər Təhsil Sektorunun müdiri Oktay Sarıkişiyev tədbiri açaraq, qonaqlara “xoş  gəldin”,-deyib, uşaqları bayram münasibəti ilə təbrik edib. Bağçanın müdiri Nigar Məmmədova da təbriklərə qoşulub.

Bayram libasında olan uşaqlar böyük sevinclə çıxış edib, mahnılar oxuyub, şeirlər deyib, rəqslər ifa ediblər.

Bayrama Novruzun simvolları olan Kosa və Keçəl də dəvət olunublar. Onların gəlişi isə uşaqların sevincini daha da artırıb. Onlar balacalarla yumurta döyüşdürüb, uşaqlara Novruz şirniyyatları paylayıb və balacalarla rəqs ediblər.

Sonra rayon rəhbəri balacalarla birlikdə bayram tonqalını yandırıb.

Tədbirdə iştirak edən rayon icra hakimiyyətinin başçısı Müstəqim Məmmədov balacaları xalqımızın milli bayramı olan Novruz münasibəti ilə təbrik edib, valideynlərə, tərbiyəçilərə, körpələrə ən xoş arzularını çatdırıb, Novruzun ən qədim bayramlardan biri olduğunu diqqətə çatdıraraq, bu bayramın müstəqillik qazanıldıqdan sonra daha böyük təmtəraqla qeyd olunduğunu bildirib.

Rayon rəhbəri uşaqlarla xatirə şəkilləri çəkdirib.