“Xocalı əsrin faciəsidir” inşa yazı müsabiqəsi keçirilib

Tərtər Rayon İcra Hakimiyyəti Xocalı soyqırımının 25-ci ildönümü münasibəti ilə Tədbirlər Planına uyğun olaraq Təhsil şöbəsi, Gənclər və İdman İdarəsi ilə birlikdə rayonun ümumtəhsil məktəblərinin şagirdləri arasında “Xocalı əsrin faciəsidir” mövzusunda inşa yazı müsabiqəsi keçirib.

Müsabiqənin birinci mərhələsi rayonun bütün məktəblərində, yekun mərhələsi isə Uşaq-Gənclər Şahmat Məktəbində keçirilib. Müsabiqədə 42 ümumtəhsil məktəbindən 42 şagird iştirak edib. Müsabiqəyə 2 akademik saat vaxt ayrılmışdır.

Tədbirdə əvvəlcə rayon icra hakimiyyəti başçısı aparatının ictimai-siyasi və humanitar məsələlər şöbəsinin baş məsləhətçisi Tunarə Məmmədzadə, Gənclər və İdman idarəsinin rəisi Emin Pənahov, rayon Təhsil şöbəsinin nümayəndələri Rasim Bayramov, Nigar Məstalızadə məktəbliləri salamlamış, onlara Xocalı soyqırımı qurbanları haqqında məlumat vermişlər. Qeyd olunmuşdur ki, 1992-ci il fevralın 26-da Ermənistan hərbi birləşmələri Rusiyanın 366-cı motoatıcı alayının iştirakı ilə 7 min əhalisi olan Xocalı şəhərində genosid aktı həyata keçirdi. Ermənistan hərbi birləşmələrinin şəhərə hücumu zamanı burada yalnız 3 minə yaxın insan qalmışdı. Hadisələrin gərginləşdiyi zaman, 4 aydan artıq mühasirədə qaldığı üçün 4000 insan tədricən şəhəri  tərk etmişdir. Xocalı soyqırımında 613 nəfər ödürüldü, 1000 nəfər müxtəlif yaşlı dinc sakin aldığı güllə yarasından əlil oldu. 106 nəfər qadın, 63 azyaşlı uşaq, 70 qoca güllələndi. 8 ailə tamamilə məhv edildi, 25 uşaq hər iki valideynini, 130 nəfər valideyinlərindən birini itirdi. Faciə baş verən gecə 1275 nəfər dinc sakin girov götürüldü, onların 150-sinin taleyi indi də məlum deyil.

Növbəti həftədə qaliblər müəyyən olunaraq, ilk 3 yerin qalibi rayon Gənclər və İdman İdarəsi tərəfindən diplomlarla mükafatlandırılacaq.