“20 Yanvar” faciəsinə həsr olunmuş şahmat üzrə rayon birinciliyinə start verilib
Tərtər Rayon İcra Hakimiyyətinin, YAP Tərtər rayon təşkilatının və Tərtər və Ağdərə rayonları üzrə Təhsil sektorunun birgə təşkilatçılığı ilə Tərtər Uşaq Gənclər İdman Şahmat məktəbində ümumtəhsil məktəblərinin şagirdləri arasında “20 Yanvar” faciəsinə həsr olunmuş şahmat üzrə rayon birinciliyinə start verilib. Yarışa dörd yaş qrupları üzrə ümumilikdə 64 şagird qatılıb.
Əvvəlcə ölkəmizin suverenliyi və ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.
Sonra Tərtər və Ağdərə rayonları üzrə Təhsil Sektorunun müdiri Oktay Sarıkişiyev, rayon icra hakimiyyəti başçısı aparatının Müharibə iştirakçıları və şəhid ailələri ilə işin təşkili sektorunun Böyük məsləhətçisi Pərviz Murtuzayev, YAP Tərtər rayon təşkilatının nümayəndəsi Gündüz Alıkişiyev, Uşaq Gənclər İdman və Şahmat məktəbinin direktoru Fərəc Rzayev, Təhsil İşçiləri Həmkarlar Komitəsinin sədri Niyaməddin Aslanov məktəbliləri salamlayaraq, onlara 1990-cı ilin yanvar ayının 19-dan 20-nə xalqımıza qarşı törədilən xəyanətlərdən, amansız soyqırımdan danışıblar. Qeyd olunub ki, bu faciələrin başında xalqın demokratiya uğrunda olan həvəsini, azadlıq məfkurəsini qırmaq məqsədi dururdu. Lakin azadlıq mücahidləri yalın əllə tankların qarşısına çıxmağı bacardılar, birlik nümayiş etdirərək, suverenliyimizə qarşı çıxanlara öz canları bahasına cavab verdilər.
Qeyd olunub ki, Sovet qoşunlarının təcavüzü nəticəsində Bakıda 140-a yaxın vətəndaş öldürüldü, 700-dən çox adam yaralandı, öldürülənlərin arasında beş millətin nümayəndələri, 20-dən çox qadın və uşaq var idi. 841 nəfər qanunsuz həbs olundu, 4 nəfər itkin düşdü. Hərbi təcavüzkarlar tərəfindən 200 еv və mənzil, 80 avtomaşın yandırıldı,yüzlərlə insan-qoca, uşaq və qadınların meyiti təhqir olundu.
Xalqın bu agır günündə Ümummilli Liderimiz Heydər Əliyev ailəsi ilə birgə yanvarın 21-də Azərbaycanın Moskvadakı daimi nümayəndəliyinə gəldi və sərt bəyanatla çıxış etdi.
Çıxışçılar xalqımızın qanlı yaddaş səhifəsi olan 20 Yanvar faciəsinin qurbanlarının xatirəsini həmişə əziz tutulduğunu, onların heç vaxt unudulmadığını bildiriblər.
Sonra turnirə start verildi.
