“Yüksəliş” müsabiqəsinin işçi qrupunun nümayəndəsi Tərtərdə gənclərlə görüşüb.
11 mart 2022-ci il tarixdə Tərtər rayon Gənclər mərkəzində baş tutan görüşdə Tərtər rayon Gənclər və İdman İdarəsinin rəisi Emin Pənahov, “Yüksəliş” müsabiqəsinin işçi qrupunun nümayəndəsi Vüsal Duqi, eləcə də rayonun müxtəlif idarə-müəssisə və təşkilatlarında çalışan bir qrup gənc iştirak edib.
Tədbiri açıq elan edən Gənclər və İdman İdarəsinin rəisi Emin Pənahov çıxışında qeyd etmişdir ki, "Yüksəliş" müsabiqəsi Azərbaycan Respublikasının Prezidenti Cənab İlham Əliyevin 26 iyul 2019-cu il tarixində imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.Qeydiyyatı davam edən hazırki müsabiqə ikinci “Yüksəliş” müsabiqəsidir.
Müsabiqəyə qoşulmağa çağırış edən E.Pənahov qeyd etmişdir ki: “44 günlük Vətən müharibəsində Azərbaycan Qarabağı erməni işğalından azad etməklə tarixi qələbəyə imza atdı. Bu qələbənin əldə edilməsində heç şübhəsiz gənclərin əvəzolunmaz rolunu vurğulamaq mütləqdir. İndi qarşımızda duran əsas vəzifə Azərbaycanın bütün sahələrində yeni yüksəkliklərin fəth edilməsidir. Bu baxımdan potensiallı gənclərimizə ehtiyac var. Əminəm ki, Azərbaycanda yüksək idarəçilik bacarığı və intellektual səviyyəsi olan gənclər çoxdur. Məhz o gənclərin aşkar edilməsi üçün ölkəmizdə “Yüksəliş” Müsabiqəsi keçirilir. Özünə güvənən, Azərbaycanın gələcəyinə biganə olmayan və ölkəmizin gələcəyini qurmağa töhvə verən gənclərimizi “Yüksəliş” Müsabiqəsinə qoşulmağa dəvət edirəm. Mən də öz növbəmdə Tərtər rayonunda müxtəlif sahələrdə çalışan perspektivli gənclərimizi Yüksəliş müsabiqəsinə qoşulmağa, qalib gəlməyə, yüksəliş əldə etməyə səsləyirəm”.
Daha sonra müsabiqənin işçi qrupunun nümayəndəsi Vüsal Duqi “Yüksəliş”də iştirak etmək üçün vacib olan tələbləri vurğulamış, qeydiyyat mərhələsi, eləcə də müsabiqənin mərhələləri barədə maarifləndirici məlumatlar vermiş və görüş iştirakçılarını maraqlandıran suallara cavab vermişdir.
