Tərtər rayon İcra Hakimiyyətinin başçısı imtahan keçiriləcək məktəblərdə olub

Nazirlər Kabineti tərəfindən koronavirus (COVID-19) infeksiyasının ölkə ərazisində yayılmasının və onun törədə biləcəyi fəsadların qarşısının alınması məqsədilə görülən işlər, Azərbaycan Respublikası ərazisində xüsusi karantin rejimi müddətinin daha da uzadılması, o cümlədən təhsil müəssisələrində tədris, təlim-tərbiyə prosesinin dayandırılması Azərbaycan Respublikasının Dövlət İmtahan Mərkəzinin fəaliyyət istiqamətlərinə uyğun həyata keçirilən tədbirlərdə müəyyən dəyişikliklərin edilməsini zəruri edib. Yaranmış vəziyyətlə əlaqədar buraxılış və qəbul imtahanları qaydalarında müəyyən dəyişikliklər edilib. Belə ki, 2020-ci ildə keçiriləcək imtahan və tədbirlərə dair müvəqqəti müddəalar təqdim olunub. Bütün imtahanlar yeni sanitar-gigiyenik qaydaları əsasında aparılacaq. İmtahan zallarında 15 nəfərdən çox olmamaq şərti ilə hər masa arxasında 1 şagird (abituriyent) əyləşəcək. Nazirlər Kabineti yanında Operativ Qərargahın qərarlarından asılı olaraq imtahanların bölgələr üzrə keçirilməsi nəzərdə tutulur. Həmçinin buraxılış imtahanlarının iyun ayı ərzində, ali təhsil müəssisələrinə qəbul imtahanlarının 20 iyul tarixindən sonra 1 dəfə keçirilməsi planlaşdırılır. Tərtər rayonunda da Nazirlər Kabineti yanında Operativ Qərargahın qərarlarına, DİM-in tələb və tövsiyələrinə birmənalı şəkildə əməl olunur. Məktəblərdə imtahanların yüksək səviyyədə keçirilməsi üçün lazımi şərait yaradılır. Bu gün Tərtər rayon İcra Hakimiyyətinin başçısı Müstəqim Məmmədov adiyyəti məsul şəxslərlə birgə imtahan keçirilməsi nəzərdə tutulan Tərtər şəhər 1, 6, Şıxarx 2 saylı tam orta məktəblərdə və şəhər 2 saylı məktəb-liseydə mövcud vəziyyətlə yerində tanış oldu, sanitar qovşaqların təmiri vəziyyəti, dezinfeksiya tədbirlərinin görülməsi və gigiyena qaydalarına əməl olunması ilə bağlı müvafiq tapşırıq və tövsiyyələrini verdi.