Tərtərdə körpələr evi-uşaq bağçalarında Yeni il şənlikləri keçirilir

Tərtər şəhər 4 saylı körpələr evi-uşaq bağçasının kollektivi Yeni il şənliyinə xüsusi hazırlaşmışdılar. Çünki şənlik keçirildiyi gün onların həm də yeni müasir tipli binaya köçmələrinin bir ili tamam olurdu.  Uşaqların, valdeyinlərin, kollektivin hər bir üzvünün də çöhrəsindən sevinc tökülürdü. Şəhər 2 saylı, 5 saylı, Seydimli və Kəngərli kənd körpələr evi-uşaq bağçalarında da Yeni il şənliyi yaddaqalan oldu. Balacalar Şaxta babanı, Qar qızı, şən kulonları alqışlarla qarşıladılar. Hər biri Şaxta babaya şeir dedi, səhnəciklər göstərildi, rəqslər etdilər.

Tədbirdə iştirak edən rayon icra hakimiyyətinin başçısı Müstəqim Məmmədov balacaları Dünya Azərbaycanlılarının Həmrəyliyi Günü və Yeni il Bayramı münasibəti ilə təbrik edərək, bildirdi ki, Ulu Öndər “Uşaqlar bizim gələcəyimizdir”,-deyirdi. Müasir tipli, yeni avadanlıqlarla təchiz olunmuş bağçaların istifadəyə verilməsi gələcəyimizə olan diqqətin, qayğının təzahürüdür.

Ötən illərdə şəhər 2 saylı, Seydimli, Gülabatlı, Sarıcalı kənd körpələr evi-uşaq bağçaları əsaslı təmir olunub. Sonra 100 yerlik “Nərgizim” uşaq bağçası, məcburi köçkünlər üçün salınmış qəsəbədə 280 yerlik möhtəşəm bir körpələr evi-uşaq bağçası istifadəyə verilib.

Həyata keçirilən layihələr uşaqların sosial müdafiəsinin gücləndirilməsi istiqamətində Azərbaycanda aparılan uğurlu siyasətin məntiqi nəticəsidir.

Şəhər 2, 4, 5 saylı, Seydimli və Kəngərli kənd körpələr evi-uşaq bağçalarının müdirləri Kəmalə Həsənova, Samirə Paşayeva, Nigar Məmmədova, Hicrah Hüseynova və Semnarə Hüseynova  çıxış edərək  uşaqların sosial müdafiəsinin gücləndirilməsinə, onların sağlam və xoşbəxt böyümələrinə dövlət tərəfindən göstərilən diqqət və qayğıya görə tərtərlilər adından Möhtərəm Prezidentimiz İlham Əliyev cənablarına öz minnətdarlıqlarını bildirdilər.

Sonda rayon rəhbəri balacalara Yeni il hədiyələri payladı.