Əskipara kənd sakinlərinin müraciətlərinə yerində baxıldı

Əskipara kənd sakinlərinin örüş torpaqlarının zəbti ilə bağlı müraciətləri ilə əlaqədar olaraq rayon icra hakimiyyətinin başçısı Müstəqim Məmmədov, rayon prokuroru Şıxəli Alməmmədov, polis şöbəsinin rəisi Elçin Qasımov, Dövlət Təhlükəsizlik Xidmətinin Tərtər Rayon Şöbəsinin rəisi Ülvi Kazımov, Qarabağ Əlilləri, Veteranları və Şəhid Ailələri İctimai Birliyinin Tərtər rayon şöbəsinin sədri Suliddin Yusibov Əskipara kəndinə gedərək vətəndaşları örüş sahəsinin ərazisində qəbul etmişlər. Rayon rəhbəri vətəndaşlara bildirmişdir ki, örüş torpaqları heç vaxt əkilə bilməz, torpaqlar təyinatı üzrə istifadə olunmalıdır.

Sakinlərə məlumat verilmişdir ki, Dövlət Əmlak Komitəsinin Bərdə Ərazi şöbəsinin əməkdaşları tərəfindən örüş yerinə baxış keçirilmiş, zəbt edilmiş örüş torpaqları barədə akt tərtib olunmuş, sənədlər Əmlak Məsələləri Dövlət Komitəsi Yanında Torpaqların Dövlət İdarəetməsinin Təşkili üzrə Agentliyə göndərilmiş, örüş torpağını əkən vətəndaşlar İXM-nin 241.1 maddəsinə əsasən hər biri 500 manat məbləğində cərimə olunmuşlar. Kənd sakinləri Natiq Quluyev, Babək Sadıqov, Habil Abdullayev, Firudin Tağıyev, Zakir Mirzəyev, Sədrəddin Qasımov, Əli Əsədov, Bəhruz Hümbətov və başqaları onların müraciətlərinə yerində baxıldığı üçün rayon rəhbərliyinə öz minnətdarlıqlarını bildirmişlər.