Qaynaq kəndində səyyar qəbul-görüş keçirdi

Tərtər Rayon İcra Hakimiyyəti başçısının növbəti səyyar qəbul-görüşü Qaynaq kəndində keçirildi. Qəbulda rayon icra hakimiyyətinin, hüquq-mühafizə orqanlarının, səhiyyə, təhsil, mədəniyyət və digər xidmət təşkilatlarının rəhbərləri, ərazi icra nümayəndələri, bələdiyyə sədrləri, kənd sakinləri iştirak etdilər.

Əvvəlcə Qaynaq kənd İƏD üzrə nümayəndə Məzahir Süleymanov kəndin sosial-iqtisadi inkişafı, əhalisi, onların məşğuliyyəti, görülən işlər barədə məlumat verib, kənddə mövcud olan sosial obyektlərin vəziyyətindən danışdı. Bildirdi ki, Qaynaq kəndinin 474 təsərrufatı, 1040 nəfər əhalisi var. Kənddə 140 yerlik bir ümumi orta məktəb , 1 kitabxana , 1 tibb məntəqəsi, 1 poçt , 286 nömrəlik ATS, 4 ticarət köşkü, 4 məişət xidməti obyekti fəaliyyət göstərir.

Kənd sakinlərinin əsas məşğuliyyəti əkinçilik və maldarlıqdır. Onlar ötən il dövlətə hər hektardan 456 ton buğda, 480 ton arpa, 7770 ton pambıq, 2359 ton çuğundur təhvil veriblər. 342 kq barama istehsal ediblər.
Bu il isə qaynaqlılar 80 hektarda buğda, 120 hektar arpa, 45 hektar çuğundur, 274 hektar pambıq əkiblər. 343 ton taxıl, 366 ton arpa təhvil veriblər. 502 kq barama istehsal ediblər.

Hazırda pambıq tarlalarında becərmə işləri ilə məşğuldurlar, kollar daraq bağlayıb, bol məhsul götürəcəklərindən xəbər verir.

Sonra sakinlərin müraciətləri dinlənildi. Kənd ağsaqqalı, “Qırmızı Əmək Bayrağı” ordenli, “Azərbaycan Cumhuriyyətinin 100 illik yubleyi” medalı ilə təltif olunmuş 83 yaşlı Süleyman Quliyev respublika Prezidenti tərəfindən əhaliyə göstərilən diqqət və qayğıdan, onların sosial problemlərinin həllindən, hazırda kəndlərinin  abad bir kəndə çevrildiyindən danışdı. Göstərilən diqqət və qayğıya görə ölkə başçısı cənab İlham Əliyevə kənd sakinləri adından öz minnətdarlığını bildirdi. İnsanların xoşbəxt, firavan həyatından danışdı. Sonra kəndin əsas yolunun asfaltlanmasına, elektrik təsərüfatının yenidən qurulmasına ehtiyac olduğunu bildirdi.

Kənd sakinləri Ofeliya Abışova, Siyatel Muxtarova pay torpaqlarının, Yaqub Əliyev örüş yerinin zəbti ilə, Tofiq Quliyev əkin sahələrinin suvarmasında çətinliyin aradan qaldırılması üçün yeni subartezian quyusunun qazılması, Asif Əhmədov kənddə müasir tipli tibb məntəqəsinə ehtiyac olması ilə bağlı müraciət etdilər.

Edilən müraciətlərlə bağlı əlaqədar təşkilatlara müvafiq tapşırıqlar verildi.

Rayon icra hakimiyyətinin başçısı Müstəqim Məmmədov  əhalinin sosial müdafiəsi və sosial rifahının yüksəldilməsi istiqamətində görülən işlərdən, əhalini narahat edən problemlərin həlli istiqamətində həyata keçirilən tədbirlərdən danışdı, Azərbaycan Respublikasının Prezidenti cənab İlham Əliyevin Sərəncamları ilə şəhid ailələrinə birdəfəlik ödəmə verilməsinin, minimum əməkhaqqının 180 manatdan 250 manata çatdırılmasından, minimum pensiyanin, tələbələrin təqaüdlərinin əhəmiyyətli dərəcədə artırılması, qaçqınlar və məcburi köçkünlər də daxil olmaqla bütün növ müavinətlərin 100 faiz həcmində artırıldığını diqqətə çatdırdı.

Kənd sakinləri əhalinin məişət şəraitinin yaxşılaşdırılması istiqamətində görülən işlərə, sosial problemlərinin həllinə görə ölkə rəhbərinə minnətdarlıqlarını bildirdilər.